Супрацоўнікі бібліятэкі пазнаёмілі школьнікаў, што сабраліся на выстаўцы, з каштоўнымі скарбамі беларускай культуры — першымі факсімільнымі выданнямі нашага знакамітага друкара. Нацыянальная бібліятэка некалькі год таму ініцыявала маштабны праект па факсімільнаму выданню ўсіх кніжак Скарыны, арыгіналы якіх цяпер раскіданыя па ўсяму свету. Сёння ў раённай бібліятэцы захоўваецца Пяцікніжжа скарынаўскай Бібліі — гэтыя выдатна аформленыя экзэмпляры ў скураных пераплетах з максімальнай паўнатой узнаўляюць усе асаблівасці першакрыніц. Кожная з кніг выйшла ў суправаджэнні навуковых каментарыяў, а таксама перакладаў на рускую, беларускаю ды англійскую мовы. Як расказала Алена Марозава, у бліжэйшых планах горацкай бібліятэкі набыццё ўсіх астатніх тамоў гэтай серыі, якая ўключае на дадзены момант найбольш поўны збор спадчыны Скарыны.

Акрамя таго, на сустрэчы былі прадстаўлены іншыя ўнікальныя ўзоры факсімільных выданняў беларускіх літаратурных помнікаў. У рамках праекту «Вяртанне святыні» Беларускім экзархатам было выпушчана ў свет знакамітае «Слуцкае евангелле». Пра заблытаны, амаль дэтэктыўны лёс гэтай найвялікшай праваслаўнай святыні, гісторыіі яе стварэння, знікненнях ды цудоўным звяртанні ва ўлонне БПЦ расказала гасцям Ганна Яроменка. Факсімільнае выданне сімвала духоўнага некалі адраджэння беларускай нацыі выйшла тыражом усяго 500 экзэмпляраў і ўяўляе сабою велізарнага фармату фаліянт вагой у некалькі кілаграмаў.

Трэцім экспанатам выстаўкі стала «Житие Евфросинии Полоцкой» — пра асаблівасці гэтага калекцыйнага выдання мы нядаўна пісалі вось тут.